من الاسكندرية

السلام عليكم و رحمه الله وبركاته

انا كنت عاوزه اقول كذا حاجه

الواحد حس بقيمه اصحابه يمكن عشان انا بعيده عنهم بس بجد وحشونى اوى مع ان ممكن ابقى جانبهم و مانتقبلش بس ببأه حساه انى فى اى وقت هاحتجهم هالقيهم بس عارفين يمكن علشان احنا جنب بعض مش حاسين بقيمه بعض و مش بنعبر لهم عن حبنا فى الله و ان اد ايه هما مهمين بالنسه بالنا وكمان مش بنعمل حاجه عشان نقوى علاقتنا يلا الحمد لله

...................................

مع انى مسافره اغير جو وانا اصلا بحب السفر و بحب البحر اوى بس السنه دى حاسه بشعورغريب

...................................

هو انا عندى مشكله و هى اصلا اللى كانت مخليانى مش عاوزه أدون

ان انا مش بعرف اكتب اوى او يمكن بخاف من الكتابه مش عارفه ليه يمكن بحس ان انا مش هاعرف اوصل اللى انا عاوزاه او حد هايفمنى غلط بس انا بحاول وربنا يسهل

...................................

هو انا ليه دائما مش مركزه الاول اقعد احدد اهدافى تمام واقول خلاص انا هابدأ بجد و بعدين تعدى الايام وتفوت والاقى نفسى زى ما انا ما حققتش حاجه من اللى انا كنت محدداها لنفسى انهارده كنت بقرأ فى كتاب و لقيت المقوله ديه "ان الخطا الاكبر ان تنظم الحياه من حولك وتترك الفوضه فى قلبك"لمصطفى صادق الرفاعى

حسيت انها بتنطبق على اوى لان الواحد لو فضل مركز بره وسايب نفسه هايجى يوم و يقع ومش هايقدر يكمل بس خلاص ان شاء الله هاركز مع نفسى وادعولى

.....................................

الاحداث الاخيره من اعتقالات للاخوان والمحاكم العسكريه حاجه توجع القلب وتخلى الواحد يسأل نفسه هو بيعمل ايه فى دنيته ولاخرته و ببأه حاسه بعزه ان دول هما ابائى وقدوتى

......................................

ان شاء الله هاكتب على جنب المدونه كل يومين او ثلاثه ايه او حكمه او مقوله او شعر اثر فيا

.....................................

تخيلوا رمضان خلاص فاضل عليه اقل من شهر هل انا استعديت لرمضان وعديت له العده ولا لسه مش حاسه اصلا انه قرب
اللهم بلغنا رمضان واجعلنا نحسن العمل فيه وتقبله منا و اخرجنا منه مغفور ذنوبنا

......................................